Xa temos aquí o entroido de este novo ano 2008, xa temos o novo cartel (feo o meu parecer) e tamén temos unhas ganas enormes de que cheguen estas fechas de folión, festa e fariña, as tres efes.

Aínda que non temos o programa de este ano, supoñemos que a cousa irá polos mesmos trazos que os outros anos:

- Xoves 24 de xaneiro, Xoves de Compadres:

Neste dia os rapaces xa podemos botar fariña ás rapazas, iso si, sempre con educación e boas formas. É o día no que se coloca o lardeiro, ou compadre, no mastro da plaza do pobo, que o martes será queimado xunto coa lardeira.

- Xoves 31 de xaneiro, Xoves de Comadres:

E neste dia son as rapazas as que poden botar fariña ós rapaces e coa mesma educación que o xoves pasado. Nesta ocasión correspóndelle a lardeira ser alzada no mastil a carón do lardeiro presidindo a praza e esperando a queima do martes.

- Venres 1 e Sábado 2 de febreiro, Festa nocturna:

O que teñen estas dúas noites e moita festa, folións tocando toda a noite e moita fariña por todos os locais e rúas do pobo e o mellor a xente dándoo todo pola festa, participando na fariña, no folión e sendo parte do pobo, non se pode explicar, tes que vir a vivilo.

- Domingo 3 de febreiro, Festa da Androlla:

Este dia celébrase un o desfile típico do domingo gordo ou domingo de entroido, con pasarruas, carrozas, comparsas e os mellores folións da zona, de Viana, Fradelo, Vilarmeao, Santa Mariña…

Tamén se pode probar a Androlla, ese embutido de costela adobada típico de Viana, na praza do pobo con una pequena degustación gratuíta de androlla, chourizo un anaco de pan e un vasiño de viño.E para os que queiran seguir disfrutando da festa poden acudir o pavillón polideportivo municipal no que se celebra a edición XXXVIII da Festa da Androlla, unha comilona que ven sendo caldo, cocido e cabrito acompañados con viños, postres e licores da zona. Un gran menú por un prezo, que en edicións anteriores rondaba entre os 15 e 18 euros, nun local a cuberto do frío e cunha asistencia de unhas 2000 persoas.

- Luns 4 de febreiro, Luns de Entroido:

O luns suelen celebrar o entroido para os mais cativos, con xogos e actuacións de algún mago, como o Mago Teto, ou algún grupo de paiasos, na praza maior do pobo.

- Martes 5 de febreiro, Martes de Entroido:

Este é o dia no que pechamos o entroido, no que queimamos os lardeiros colocados os xoves de compadres e de comadres na praza o son do folión que derramando os últimos puñados de fariña antes das 12 da noite, hora na que arde o entroido.

- Mércores 6 de febreiro, Mercores de Cinza:

O dia da sardiña, a que sacamos a pasear polas rúas da vila e chorando despedímola ata o ano seguinte. Rematamos o enterro na Plaza do Cabo da Vila, na zona mais antiga de Viana as carón da torre do homenaxe e alí poderemos degustar sardiñas a prancha con un grolo de viño mais algunha torrexa de postre, todo gratis. 

E así transcorre un entroido en Viana, aínda que isto é un resumo de todo o que realmente podedes vivir si vos pasades a visitarnos.

Déixovos unha imaxe (extraída do poboado de Viana en lycos) do cartel do entroido deste ano, feo para o meu parecer e pouco profesional: Cartel do Entroido 2008

Esta entrada foi publicada o Mércores, 16 de Xaneiro de 2008 as 23:28 e está clasificada baixo: Cultura, Entroido, Viana do Bolo. Pode facer un seguimento dos comentarios desta entrada grazas o feed RSS 2.0. Puede deixar un comentario, ou enviar un trackback dende o seu sitio.